schrieverij

Grunnegs Light 1: Veurleescup 2010

2010-03-27T13:41:00.006+01:00

Wonsdag 24 meert was der ain van de veurrondes van de Veurleescup 2010 ien de Schilderschoul ien Beem. Tien kiender (foto) oet groep 7 en 8 deden mit van legere schoulen oet Beem, Mij, t Zaand, Westeremden, Waarvum en Oethoezen. Vief binnen deurgoan noar de feestelke finoale van de Veurleescup volgende week wonsdag om 14.30 uur ien de Zeehondencrèche ien Paiderboeren.
Ain van de ien totoal twaalf finoalisten zel mit t veurlezen van n Grunneger tekst de Veurleescup 2010 winnen. Prezentoatsie is ien handen van Miranda Bolhuis, Olaf Vos komt ook. De cup wordt oetlangd deur Lenie 't Hart.

Foto: Jan Glas

Nije Krödde, nr 113

2010-03-25T01:28:00.005+01:00

De nije Krödde is oet, nr 113. Mit verhoalen en gedichten van o.a. Jan Blaauw, Chris Kiel, Yur, Aly Freije, Tonko Ufkes, Jurrien Veenstra en Rik Andreae. Hanne Wilzing het wat schreven over schriever Jan Hendrik Neuteboom. Wilzing is tot nou tou de eerste en ainege schriever ien Krödde dij ien t Westerwolds schrift. Der staait n interview mit hom ien dit veujoarsnummer.

Op vroag woarom e schrift zegt Wilzing:
Schrieven is oamen. Dou k al sunt mien twaalfde (mit oamen begon k vanzulven al wat eerder). Verskes en schriefsels in schoolschriftjes en dagboukjes. Perbaaiern t levent - mit aal zien mooie, spannende en roege kanten - op te vangen in woorden. Ook al stijt De Slegte vol mit ramsj, toch mouve schrieven. Schrieven is scheppen. Vullen wat woest en leeg is. Eerst göng t in t Hollands, man leste vief joar in t Grunnegs. t Helpt mie um mit mien eerste toal bezig te blieven. Mien vraauw zegt dat sfeer van schriefsels in t Grunnegs wol anders is. Bas wordt leger en tred troager. (...) k Wil leuf ik ook wol wat zeggen. Over mooie klaaine dingen in scheppen, over lutje en groot geluk, over hou lu nkander - um mit Buber te zeggen - mìsmouten kinnen in ploats van òntmouten. En over dingen dij slim mis binnen in onze wereld en woar ve aingst nich over swiegen kinnen.

Lözze nummers a € 4,00 of n abonnement a € 15,00 kinnen je hier aanvroagen.

Foto: Jan Glas

Nije rubriek: 'Grunnegs Light'

2010-03-24T22:49:00.004+01:00

Schrieverij gaait veuraal over literatuur ien de Grunneger toal. Mor veur Grunneger ditjes en datjes dij nait muf roeken is der vanof nou de rubriek 'Grunnegs Light': nait al te belegen onderwaarpen dij mit de toal te moaken hemmen.

Nije Nedersaksische bloumlezen: 'Onderwegens'

2010-03-18T13:24:00.006+01:00

Op 20 meert, tiedens de Dag van de Grunneger Toal, wordt n nije bloumlezen prezenteerd. Tiedens de dag is de bundel vergees te verkriegen. De bundel is verschenen noar aanlaaiden van schrieverstrevven ien Schaanze eerder dit joar. Oet t veurwoord:

Onderwegens is schreven deur Grunneger, Drentse en Oost-Vraize schrievers mit nije gedichten en verhoalen in t Nedersaksisch. n Toal dij ok per regio weer zoveul varianten kent.
Onderwegens is n inspirerend thema, want t gaait over grenzen. En in t grenslaand van dizze toal is veul ‘onderwegens’: De toal dij in ontwikkeln is, en doarbie zukzulf weer veur n dail opnij oetvinden mout in dizze tied; en het echt op raaize goan, van d’aine plek noar d’aander. Of is dat ook veural t raaizen in d’aigen geest? Voak raaizen wie ok deur de tied, kommen zo herinnerns veurbie.
t Is altied dat onderwegens wezen, deur de seizoenen goan, de elementen ervoaren en de weg van geboorte noar dood. Of draait alles om de raaize in joezulf, mit de hinderloagen van t leven, woarin de mooiste verhoalen en gedichten ontstoan?

Aanlaiden was n schrieverstrevven in Schaanze in feberwoarie 2010, regeld deur t tiedschrift Krödde. De bundel geft n momentopnoame van de verschaaidenhaid in het toallandschop van schrievers in ons aigen tied.

De Dag van de Grunneger toal op 20 meert 2010 vörmt n mooie gelegenhaid om dizze bundel onder n braider lezerspubliek te brengen. We bennen bliede dat Onderwegens zodounde n grode oploage krigt.

Tonko Ufkes ien Leptert

2010-03-18T02:01:00.004+01:00

Op vrijdagoavend 19 meert binnen Tonko Ufkes en Geert Zijlstra ien 't Lutje Honk ien Leptert (Lettelbert) mit gedichten en muziek ien t Westerketiers.
t Begunt om 20.00 uur, vergees.

Foto: Jan Glas

Dag van de Grunneger Toal

2010-03-18T01:46:00.005+01:00

Veur wel t nog nait mitkregen het: zodderdag 20 meert is de Dag van de Grunneger Toal van 11.00-17.00 uur ien de Grunneger Archieven ien Stad. Ter gelegenhaid van dizze dag is t blad 'Moi' oetgeven. t Blad is roem verspraaid en ligt al n zetje bie biebelthaiken deur pervinzie Grunnnen, groates. Ien t blad aandacht veur Grunnegers en heur Grunnegs.
Hieronder pergram van de dag.

De Dagblad van het Noorden Streektaalprijs 2009 is ien categorie poëzie & proza wonnen deur Johan Veenstra. Hai kreeg pries veur Et geheim van de wiend, n roman ien t Stellingwaarfs. Ien categorie CD & DVD ging pries noar Daniël Lohues veur Allennig III. Priezen werden oetlangd tiedens t streektoalfestival 'REUR' ien Emmen.

Lees op Woest en Ledig meer.

Op foto interviewt Joep van Ruiten baaide prieswinnoars.

Foto: Coen Peppelenbos. Verslag op zien site.

Optreden Aly Freije & muzikanten ien Beerte

2010-03-01T12:49:00.009+01:00

Dichteres Aly Freije treedt vrijdag 5 meert op ien t Ailko Zijlkerhuis ien Nieuw Beerta. Muzikanten Hans Bosman en Monique, René en Stanley treden tussen de veurdrachten op. Freije debuteerde veureg joar mit heur bundel Wondpoeier, ze is opgruid ien Veelerveen en woont nou ien Stad. Ien heur Grunneger poëzie volgt ze de sporen van n jeugd en nimt ze t publiek mit op n tocht deur steden en landen, verder vertelt ze over heur schrieven. De muzikanten brengen de Weltschmerz van de Klezjmer, de gevuilege dreumerghaid van Indonesische balloades en Zweedse daansmuziek.

Volwassenen: € 5.00
t Programmoa begunt om 20.00 uur
Mini-cultureel centrum Ailko Zijlker
Oostlaan 1
9687 PN NIEUW BEERTA
0597 522149

Foto: Leonie Barnier

Kom op verhoal

2010-02-25T03:35:00.003+01:00

Stichting Mien Westerkwartier wil mit t project 'Kom op verhoal' t verhoalen vertellen weerom brengen ien t Westerkwartier. Meer...

Nije bundel van Lammert Voos

2010-02-22T22:51:00.005+01:00

Vrijdag 26 feberwoarie wordt de nije bundel Grensman van Lammert Voos prezenteerd. De bundel bevat noast Nederlandstoalege gedichten ook twij Grunneger gedichten. Tiedens prezentoatsie treden der drij dichters op dij elk ien heur aigen (streek)toal veurlezen:
Tsead Bruinja (Vrais), Erik Harteveld (Drents), Hanz Mirck (Achterhoeks) en Chretien Breukers (Limburgs). Lammert Voos zingt mit zien band De Sukkerbaiten. Eerste exemploar wordt oetlangd aan Berkelder, wetholder van cultuur ien Deventer.

Plek en tied:

20.00 uur ien Centrale Bibliotheek
van Deventer

Schubert ien Grunnen

2010-02-21T22:45:00.006+01:00

Jan Siebo Uffen vertoalde Schuberts Winterreise ien t Grunnegs. Bariton Henk Smit, Grunneger van geboorte, en (forte)pianist Stanley Hoogland, specialist ien t bespeulen van olde instrumenten, voeren de laidern oet.

Uffen is neerlandicus, tekstdichter en publicist. Hai vertoalde o.a. laidern van Schubert, Schumann en Grieg ien t dialect van t Oldambt. Zien beweegreden om de laiderncyclus 'Winterreise' te vertoalen komt voort oet zien laifde, nait allain veur de toal, mor juust ook veur t Grunneger landschop. De muziek en teksten loaten heur muiteloos ien t Grunneger landschop ploatsen viendt Uffen. Der is n klankverwantschop tussen t Oldambsters en t Duuts en Uffen vuilt n emotionele verbondenhaid mit de ainzoamhaid van de hoofdfiguur ien n meedogenloos landschop dat slim denken dut aan noord-oost Grunnen.

26/2 20.15 uur - ien ’t Waarhuis, Aduarderzijl
27/2 15.00 uur - ien het Groninger Museum
28/2 15.30 uur - ien De Oosterpoort

Koarten à € 15,-

Foto Uffen: Jan Glas

Gedichten over Grunnen

2010-02-16T17:01:00.009+01:00

Triona pers/Uitgeverij Vliedorp geven mooie ambachtelke boukjes oet. Ze worden deur Dick Ronner mit haand zet oet loden en holten ledders en drukt ien klaaine oploagen, voak mit groafische illustroatsies.
Ze willen geern n mooie bloumlezen oetbrengen mit gedichten over Grunnen. Dat kin over n ploats goan mor ook over n streek.
Grunneger gedichten binnen welkom, Nederlandstoaleg kin ook. Elk kin, per mail, maksimoal 10 gedichten iensturen. Mag ook eerder publiceerd waark wezen, veurzover je t auteursrecht nait overdroagen hemmen aan daarden.
Der viendt n seleksie ploats. Ienzenden slut op 30 April 2010.

Aanmeldensformulier mit verdere informoatsie kinnen je aanvroagen per email: mail@zolderman.nl

Kortliest viefde DvhN Streektaalprijs

2010-02-15T23:31:00.011+01:00

De jury van de DvhN Streektaalprijs het de kortliesten vaststeld veur de joarlekse pries veur t beste bouk, cd of dvd ien ain van de streektoalen binnen t verspraaidensgebied van Dagblad van het Noorden. Veur literatuur binnen dat de volgende vief bouken.

Minnezinne. Drentse erotische gedichten – Delia Bremer & Ria Westerhuis

Op e tast – Tonko Ufkes

Bliedschop veur t bezeren – Henk Puister

Et geheim van de wiend – Johan Veenstra

Zo is t nait goan/Zo is het niet gegaan – Jan Glas

De winnoars van de pries worden bekendmoakt op zodderdag 6 meert ien de Openboare Biebeltaik ien Emmen tiedens streektoalfestival !Reur! Aanvang 16.00 uur.

Optreden Klatwerk, Klooster & Glas

2010-02-13T13:46:00.008+01:00

Mörgen, 14 feberwoarie, treedt Klatwerk3, Klooster & Glas op ien de Tramwerkplaats ien Winschoten. De groep is oetbraaid mit zangeres Marieke Klooster, bekend van Vrouw Holland. Marieke Klooster zingt gedichten van Jan Siebo Uffen, Jan Glas en gedichten van Vasalis vertoald ien t Grunnegs. Jan Glas zingt en leest zien gedichten veur. Jazztrio Klatwerk3 speult composities van Boelo Klat. Meer informoatsie.

Aanvang:15.00 uur. Entree: € 8,00

Tramwerkplaats o.g.
Havenkade-west 3
9672BB Winschoten
telefoon: 0597-434885

Groepspetret Nedersaksische schrievers

2010-02-07T22:56:00.007+01:00

Zodderdag 6 feberwoarie trovven twinneg Nedersaksische auteurs mekoar ien Nijschaans. Schrievers en dichters oet Drenthe, Grunnen en Oost-Vraislaand. Der is n groepspetret moakt.

En n enkel solopetret:

Jan Siebo Uffen

Veur noamen schrievers klik hier.

Foto's:Jan Glas

Wilhelmine Siefkes-pries noar Theo Schuster

2010-02-04T12:30:00.021+01:00

De Wilhelmine Siefkes-pries van de stad Leer wordt om de vaaier joar oetlangd en dit joar op 19 feberwoarie aan boukhandeloar en oetgever Theo Schuster. Schuster krigt de pries veur zien daipgroavende studies op t gebied van de Noord-Duutse volkspoëzie en veur dat hai, o.a. mit zien boukhandel ien Leer, al zowat n haalve eeuw n vureg pleitbezörger is veur de Plattduutse literatuur.
Zo verschenen bie zien oetgeverij vanof 1975 oetgoaves van t Institut für Niederdeutsche Sprache, verder het Schuster t waark van de ien 1984 overleden Siefkes opnij oetgeven. Siefkes' bekendste waark is de roman 'Keerlke'.

De pries wordt sinds 1990 oetlangd en ging o.a. ien 1990 noar Henry Hes en ien 1998 noar Kees Visscher.

Meer ien t Dagblad van het Noorden.

Meer op webstie van Stadt Leer.

Schrieverstrevven ien Nijschaans

2010-02-04T01:06:00.011+01:00

Zodderdag 6 feberwoarie is der weer n besloten Schrieverstrevven ien De Oude Remise ien Nijschaans. 21 Streektoalschrievers oet Drenthe, Oost-Vraislaand en Grunnen kommen bienkander om aigen waark veur te lezen en van gedachten te wizzeln over schrieven. Themoa van dag is 'Onderwegens'. Schrievers hemmen rond dit themoa verhoalen en gedichten schreven, dij loader ien n bloumlezen bundeld worden. Aly Freije geft n schriefworkshop. Dit soort trevvens van schrievers oet dizze drij streektoalgebieden binnen der ien t verleden al voaker west. Schier dat ter weer ain is.

Foto van 'De Oude Remise'.

Vaaierde plek veur Grunneger gedicht Jan de Jong

2010-01-31T14:14:00.008+01:00

Dönderdag 28 jannewoarie binnen prieswinnoars bekend moakt van Gedichtendag Gedichtenwedstried, organiseerd deur biebeltaik. Bie de leste 10 kaanshebbers zat ain Grunneger gedicht: 'Onderwegens' van Jan de Jong. t Gedicht is op vaaierde plek beland.

Onderwegens

Woar bin ie
as k joe stappen zai
op zundagmörn
mit taas ien haand.

Om bosschop
ien vrouger wereld
woar t aal op slöt zit
en boudel vot is.

Doeknekt op zuik
noar t pad
wat kwiet is
en niks op stee.

t Zain van stroekeln
maank herinnerns
t dut mie zeer.

Goa mor weerom
k wait t even nait meer.

Jan de Jong

Langliest DvhN Streektoalpries Poëzie & Prozoa

2010-01-30T22:44:00.010+01:00

Oet de grosliest van de Dagblad van het Noorden Streektaalprijs is de langliest soamensteld. De genomineerden veur Poëzie & Prozoa binnen:

* Wondpoeier – Aly Freije
* Minnezinne. Drentse erotische gedichten – Delia Bremer & Ria Westerhuis
* Op e tast – Tonko Ufkes
* Wizzelbörg – Nina Werkman
* Rondomrond – Kunny Luchtenberg
* Zo is t nait goan/Zo is het niet gegaan – Jan Glas
* Bliedschop veur t bezeren – Henk Puister
* Et geheim van de wiend – Johan Veenstra
* Vueltaol. Op fietse deur Drenthe – Jan Germs e.a.
* Nörger törfies – Willem Pol
* n Peerd is gain mìns – Hanny Diemer e.a.
* Laot de haon maor kreien: Drèentse verhoalen – Bas Luinge
* Dörpstraat oes Dörp – Jan Veenstra & Ton Peters
* Sikko trekt zuk aan / Sikko kleedt zich aan – Hendrik van der Ham & Thali van der Eijk
* Das aandere kovvie – Bert Uil

De kortliest wordt ien feberwoarie bekendmoakt. Pries is n oorkonde en 1001 euro. Verder worden aan de titels op de kortliest n symbolisch bedrag van 101 euro toukend.
Hier is meer te lezen, ook over langliest genomineerden veur CD & DVD.

Oetlangen van pries is op 6 meert tiedens streektaalfestival !Reur!

Nedersaksische dichters bie Godert Walter

2010-01-23T22:12:00.006+01:00

Dönderdag is t weer Gedichtendag. Ter gelegenhaid hiervan wordt ien Stad veur de elfde moal de Poëziemarathon holden op 27 & 28 jannewoarie. Twij doagen poëzie op talloze plekken ien Stad. Veur de zeuvende moal treden op de 28e weer Nedersaksische dichters op ien boukhandel Godert Walter. Ain Drentse dichter: Suze Sanders en vief Grunneger dichters: Eldert Ameling, Rik Andreae, Jan de Jong, Henk Puister en Hanne Wilzing. De oavend wordt muzikoal omliest deur saxofonist Martin Tervoort.

28 Jannewoarie bie boukhandel Godert Walter ien Stad van 19.00 – 19.45 uur. Entree groates.

Website boukhandel Godert Walter.

Website Poëziemarathon.

Nije CD 'Eerappelbloud' van Veeman & Uffen

2010-01-13T14:34:00.012+01:00

Op 14 jannewoarie om 19.00 uur is ien 'Huis de Beurs' ien Stad de flitsprizzentoatsie van 'Eerappelbloud', de nije CD van Arnold Veeman en Jan Siebo Uffen. Tougang is groates.

Veeman gebruukte eerder al n tekst van Uffen veur t laid 'Mien lutje laif'.

Dizze nije CD is n registroatsie van n concert ien theater Van Beresteyn ien Veendam ind 2009. Arnold Veeman (zang en veurdracht), Jan Siebo Uffen (veurdracht) en Nanne van der Werff (pioano). Tiedens de prizzentoatsie voert de groep drij nummers oet.
Op de CD stonnen noast n bult laidjes ook n aantal gedichten en ain verhoal.

De CD is groates te downloaden op de website van Stichting Global Art Company, mor willen je de mooi vörmgeven CD en beder geluudskwaliteit, din kinnen je de CD veur slechts € 8,95 kopen tiedens de prizzentoatsie of via dij zulfde website.

Eerste Groninger Voorlees- en Vertelsalon

2010-01-11T02:37:00.002+01:00

Vrijdag 15 jannewoarie is de bieainkomst van de Eerste Groninger Voorlees- en Vertelsalon, 20e jrg. De salon is n open podium veur schrievers, dichters, verhoalenvertellers en muzikanten. Der kin veurlezen en zongen worden oet aigen waark of waark van n aander ien de streektoal en ien t Nederlands. Je kinnen joen aigen waark promoten en verkopen. Prizzentoatsie is ien handen van Eldert Ameling. Aanvang 20.00 uur ien 't Oude Raedthuis, Hoofdstroat 15 ien Stedum. Tougang is groates.

Inlichtingen: Eldert Ameling tel. 0596-551608 of F.T. Braaksma: braeckxma@hetnet.nl.

Foto: Gertie Jaquet

Bezuik oet Moskou

2010-01-07T17:00:00.003+01:00

Mainst oet Nederland mor ook oet ale oethouken van wereld kommen bezuikers op Schrieverij. Tot de verbeelden sprekende plekken as Phoenix, Arizona en New York. Asuncion ien Paraguay, Bayreuth, Avignon, Zonhove (Belg) en guster bezuik oet Moskou. Ien Statistieken is dat apmoal noa te strunen. Nait wel, hou en woarom ze hier terechtkwammen.

9 Jannewoarie Nijjoarsveziede Stichting t Grunneger Bouk

2010-01-06T17:54:00.002+01:00

Stichting t Grunneger Bouk holdt Nijjoarsveziede op zodderdag 9 jannewoarie van 15.00 – 17.00 uur ien Hotel Spoorzicht ien Loppersum. Tougang is groates. Veurzidder H.A. Euverink opent de veziede en troubadour Hans van der Lijke zel optreden. Begunstegers van Stichting t Grunneger Bouk en Toal en Taiken kriegen n poar consumpties en elk krigt n boukje kedo. De boukenkist, vol Grunneger bouken en CD's, is der dij mirreg ook.

“Stichting t Grunneger Bouk is opricht in december 1974. t Doul is t bevördern van de oetgifte van - en t stimuleren van de belangstellen veur - bouken en aander publikoaties, schreven in t Grunnegs of n aander Nedersaksisch dialect, of (as ze betrekken hebben op stad en/of pervinsie Grunnen) in t Nederlands.”

Poëzie & Muziek oet Grunnen en Drenthe ien Roderwolde

2010-01-04T19:46:00.017+01:00

De Culturele Driehoek Roderwolde prizzenteert zundag 10 Jannewoarie n streektoalprogramma. Jan Glas leest gedichten ien Café het Rode Hert. Anne Doornbos, Drents dichter, zel doarnoa optreden in Meulen Woldzigt, Albert Boelen oet Foxwolde leest veur ien de Jacobskerk. t Pergrammoa wordt ofsloten ien Café het Rode Hert mit n optreden van Glas & KLat (foto). Jan Glas zingt aigen gedichten en Grunneger vertoalens van dichteres M. Vasalis. De teksten binnen op muziek zet deur pianist/componist Boelo Klat dij ook nog n aantal solostukken speult.

Koarten bie boukhandel Daan Nijman ien Roden
en bie Café het Rode Hert in Roderwolde tel: 050-5034238
Aanvang 15.00 uur.
Pries € 7,50

Foto: Ancel Klooster

2009 Goud joar veur streektoalpoëzie

2010-01-04T12:00:00.014+01:00

Op Woest en Ledig n artikel over de Dagblad van het Noorden Streektaalprijs.
Ien 2008 verschenen der drij gedichtenbundels ien t Drents en Grunnegs, ien 2009 waren dat ter dattien. Op grond van dizze getallen kinnen je stellen dat 2009 n goud joar was veur de streektoalpoëzie. Opzet van de pries is 'Het bekronen, belonen en stimuleren van culturele en kunstzinnige uitingen in een van de streektalen binnen het verspreidingsgebied van Dagblad van het Noorden.'

Op de grosliest stonnen bundels van:
Aly Freije, Tonko Ufkes, Nina Werkman
Henk Puister, Annie van Dijken, Jan Glas

Foto's: Jan Glas

Nije CD Westkantstad

2010-01-02T20:52:00.009+01:00

De groep Westkantstad het n nije CD oetbrocht, titel: 'Zo Mag t Weden'. Grunneger laidjes. Westkantstad bestaait oet: Gert Sennema, Roelf Postma, Vera Sutman, Jan Ruiter en Emiel Driesten.
Literatuur-iensteek: ain van de teksten is schreven deur dichters Reinder Willem Hiemstra en Melle Hijlkema.

Jan Boer leest 'Boer'

2009-12-30T14:41:00.008+01:00

Van ain van onze correspondenten kreeg Schrieverij dizze link van n olde pick-up woarop n singletje draait. Op dat singletje leest Jan Boer n poar van zien gedichten veur: wie heuren t gedicht 'Boer'.

Nije Krödde

2009-12-22T03:58:00.014+01:00

t Winternummer 112 van Krödde is oet. Mit verhoalen en gedichten van o.a. Melle Hijlkema, Fieke Gosselaar, Reinder Willem Hiemstra, Jan de Jong, Tonko Ufkes, Lammert Voos en Hanne Wilzing.

Aly Freije het dit joar de Literaire Pries van Stichting 't Grunneger Bouk wonnen, noast n verhoal van Freije staait ter ien dit nummer ook n interview mit heur.

Op de vroag woarom ze schrift, antwoordt Freije: 'Bouken boden mie aaltied n plek woar ik miezulf wezen kon, en nije werelden zuk openden mit spannende mensen. Ik kreeg n gevuil veur roemte, dat veul verder ging as de wiedse oetzichten om onze boerderij. Veul proat wer der nait thoes, dus ik las alles van kinderbiebel, A.M de Jong, Readers Digest tot de De bloeiende Bongerd dij mien mouder op Industrieschoul kregen har. Ik legde as kind figuurkes oet salmiakzakjes bie mekoar en verzon der verhoalen bie. In de Lexicon van Seksuologie, dij k stiekem van mien olders las, kwam ik woorden tegen as nymphomanie en homoseksualiteit, duustere begrippen dou. Mor nijsgiereghaid dreef mie verder. En dat was en is n belaangrieke reden om te schrieven, om wat oet te zuiken, vinger aargens achter te kriegen, wat aaltied ook mor weer veur n dail lukt, dus gain end het.'

Lözze nummers a € 4,00 of n abonnement a € 15,00 kinnen je hier aanvroagen.

Foto: Jan Glas

DVD 'Moest Kieken' prizzenteerd

2009-12-14T18:31:00.012+01:00

Zundagmirreg 13 december is de film 'Moest Kieken' van Stichting Mien Westerkwartier ien n besloten veurstellen ien première goan. Op Lutjegast Online is hierover n verslag te lezen. De film is opnomen ien t Westerkwartier, moakers binnen Ben Zielstra en Wobbe Gorter.

Vera Sutman speult n muze op zuik noar heur bestemmen. Ze ridt ien heur rooie Citroën eend deur t Westerkwartier; t mooie landschop van coulissen, deurkiekjes en vergezichten. Onderwegens helpen dichters, verhoalenvertellers en muzikanten heur op weg. Tonko Ufkes, Melle Hijlkema en Klaas Duursma hebben o.a. mitwaarkt aan dizze produksie. Hier is de trailer te bekieken. Doar is ook de DVD te bestellen veur 10 euro, mor ook gewoon te koop bie boukhandel Godert Walter.

Verslag van prizzentoatsie op website Dagblad v/h Noorden.

Foto's: Omke Oudeman

Herdenken Jan Hendrik Neuteboom

2009-12-11T01:24:00.009+01:00

Op valreep van 2009 herdenkt Verainen veur Genealogie en Geschiedenis Westerwolde ien n biezundere bieainkomst dat Jan Hendrik Neuteboom dit joar tachteg joar leden overleden is. Neuteboom het gedichten en verhoalen schreven ien t Westerwolds. Hai leefde van 1865 tot 1929 en was van 1884 tot 1894 schoulmeester ien Zèlng.

De verhoalen en gedichten dij e schreef, verschenen ien de vrouge periode van Maandblad Groningen. Dichters Jelte Dijkstra en Hans Elema waren ien dij tied al onder de iendruk van de kwaliteit van Neutebooms waark. Woarderen veur zien waark is bleven. De mins ien verdrukken tegen achtergrond van t alledoagse leven op t plattelaand is n belangriek themoa ien zien verhoalen. Ien 2001 binnen De verzamelde werken van J.H. Neuteboom verschenen, soamensteld deur Geert Luth. Neuteboom het zeuven gedichten publiceerd, woaronder Zo as 't einmaol was!, lichter kin melancholie hoast nait beschreven worden:

Zo as ’t einmaol was!

Was ’t waark an zied, bie zömmer dag,
Dan kuierd’ ik
Zo geerne wat deur ’t loug
Mit luutke Rikao an de hand.
En dij mie zag, zee in de proot,
Jan Hinnerk, jong nog tou, wat wordt dien Rikao groot!

Was ’t waark an zied bie zömmer dag,
Dan kuierd’ ik
Zo geerne wat deur ’t loug.
Mien Rikao gungk dan altied mit
En dij ons zag, dij keek mie an
En vruig, dat nuver wicht, is dat dien Rikao, Jan?

Is ’t waark an zied bie zömmer dag
Dan kuier ik
Nich geerne meer deur ’t loug,
Den Rikao, dij geit nich meer mit!
Dij mie nô zug, dij kikt mie an
En denkt, Jan Hinnerk, jong, nô bist allene man!

De bieainkomst begunt zodderdag 12 december om 13.30 ien 'De Sprankel' ien Zèlng (Sellingen). Geert Luth holdt n lezen en n verhoal van Neuteboom wordt veurlezen. Henk Scholte zingt n gedicht van Neuteboom, begelaaid deur Bert Ridderbos. Der wordt n neuteboomke poot op stee woar vrouger schoul van meester Neuteboom ston.

Schrieverij Blog ien Dagblad van het Noorden

2009-12-08T19:03:00.004+01:00

BERICHT ien Dagblad van het Noorden over Schrieverij Blog.

Dichtwedstried

2009-12-08T17:28:00.006+01:00

Biebeltaik ien Stad organiseert elk joar ien t koader van Gedichtendag/Poëziemarathon n DICHTWEDSTRIED. Dit joar is themoa 'Over de grens'. Je kinnen natuurlek ook weer Grunneger gedichten iensturen. De jury bestaait oet Liesbeth Annokkee, Douwe van der Bijl, Jane Leusink en Nina Werkman. Dij kinnen apmoal nuver goud Grunnegs lezen. Ienzender maag allain nog gain aigen bundel oetgeven hemmen, dat is ainege bepaarken. De prieswinnoars zellen opnomen worden ien de bundel 'Over de grens' en gedichten van eerste pries winnoars kommen ien Gezinsbode.

Nait meer as ain gedicht per ienzender. Gedicht van maximoal 24 regels (exclusief titel, inclusief witregels) veur 10 jannewoarie sturen noar:

Poëziewedstrijd 'Over de grens'
Bibliotheek Groningen
t.a.v. R. Sinkgraven
Oude Boteringestraat 18
9712 GH Groningen

of mailen noar:
r.sinkgraven@mijneigenbibliotheek.nl

Nina Werkman ien De Literaire Hemel

2009-12-05T16:29:00.010+01:00

Vrijdag 11 december is Nina Werkman ain van de gasten ien De Literaire Hemel, andere gasten binnen Vonne van der Meer en Suzanne Rohde.

Nina Werkman is geboren ien Bellingwolle. Ien april kwam bie oetgeverij Servo heur Grunneger bundel 'Wizzelbörg' oet. Ien de Windroosreeks van Oetgeverij Holland volgde loader dit joar de Nederlandstoalege bundel 'Antidata'. Ze won n aantal priezen, o.a: de Dunya Poëzie prijs, de SNS-literatuurprijs en de Jan Boer Poëzieprijs. Nina Werkman is aansloten bie de 'werkgroep poëzie WP99'. Dizze groep gaf drij bloumlezens oet: 'Poëzie op sokkels', 'SUIKER Poëzie' en dit joar 'Van liefde en koude min'.

Ien n interview ien Krödde nr. 111 zegt Werkman op de vroag woarom ze schrift: 'Dat, ast toch wat wilst mit wat ter beweegt, vanbinnen, din mor op pepier: dagbouken en gedichten. Sunt dat ik t in poëzie verpak, vinden hail wat lu t in ainen mooi. In gedichten kin je ook nog van ales zeggen en gounent kommen wel in de buurt van wat je mainen mor t blift veur n dail toch gehaaim.'

En over poëzie: 'Dat is nait zo gevoarlek, poëzie... En je kinnen mit n poar woorden zoveul zeggen. Dubbele en drijdubbele zin van oetdrukkens, roadsels dij der weden maggen.

De oavend begunt om 20.30 uur. Zoal is vanof 20.00 uur open. Tougang € 9,50, reserveren aanbevolen. 06-27074771 (Albert Haar) of via info@literairehemel.nl

Foto: Jan Glas

Henk Puister ien Dagblad van het Noorden

2009-12-02T00:33:00.006+01:00

Ien Dagblad van het Noorden aandacht veur 'Bliedschop veur t bezeren'. De nije dichtbundel van Henk Puister.

Jan Siebo Uffen leest

2009-11-30T11:44:00.008+01:00

Jan Siebo Uffen leest zien gedicht 'En nou sloapen goan'.

Foto: Jan Glas

Rilke ien t Grunnegs

2009-11-28T16:53:00.001+01:00

Mörgen, zundag 29 november, prizzentoatse van de essaybundel 'Een open plek' van C.O Jellema ien galerie Jacoba Wijk (Mernaweg 29, 9964 AP Wehe den Hoorn). Aanvang 16.00 uur. Grunneger iensteek: Jan Glas leest n aantal gedichten van Rilke veur, ien t Grunnegs. Vertoalens dij e moakt het veur t bouk Rilke Sieben. Zeuven gedichten van Rilke vertoald ien t Grunnegs, Drents, Nederlands en Twents.

Ook poëzie

2009-11-28T13:35:00.002+01:00

SCHRIEVERIJ viendt dit ook poëzie: STAD & 'Baalkeduuster'.

Meer over STAD

Dichters oet Stad ien Utrecht & wat over t Grunnegs

2009-11-28T12:33:00.000+01:00

Herman Sandman schrift ien de Gezinsbode n stukje over n optreden van dichters oet Stad en Sandman zulf ien Utrecht en over de Grunneger gedichten dij doar veurlezen werden deur Jan Glas.

Henk Puister signeert zien nije bundel

2009-11-27T22:30:00.000+01:00

Henk Puister signeert zien gedichtenbundel 'Bliedschop veur t bezeren'. Noa n mooie prizzentoatsie ien het Huis van de Groninger Cultuur, woar veul volk op ofkommen was. De bundel is oetgeven deur oetgeverij kleine Uil en kost € 12,50.

Kiek veur meer op Literatuurlog.

Foto: Jan Glas

Gedichten Aly Freije ien Soltauer Schriften

2009-11-27T13:43:00.000+01:00

Aly Freije won dit joar de Freudenthal-Pries veur nije Nedersaksische literatuur. Ien t nije boukdail 15 (Soltauer Schriften Binneboom - Band 15 / 2009) van t Freudenthal-Gesellschaft stonnen de gedichten van Freije ien t Grunnegs mor ook vertoald ien t Hoogduuts en ien t Oostvrais-Nederduuts.

Grunneger schrievers ien Haarfstnummer Roet

2009-11-27T11:28:00.001+01:00

Ien t haarfstnummer van t Drents Letterkundig Tiedschrift Roet noast waark ien t Drents en ien
t Hollands ook weer verhoalen en gedichten ien t Grunnegs van Tonko Ufkes, Ger Siks en Gerrit Wassing.

Jan Glas bie Cunera op Vrijdag

2009-11-27T00:30:00.000+01:00

Vrijdag 27 november wordt Jan Glas ien t tv-programma Cunera op Vrijdag ondervroagd over zien leste bundel Zo is t nait goan/Zo is het niet gegaan. De bundel was n schriefopdracht verbonden aan t Belcampo Stipendium. Ook te gast is kunstenoares Maya Wildevuur. Aanvang 18.18 uur en wordt rest van oavend elk uur herhoald. RTV-Noord.

27 november: Nije gedichtenbundel Henk Puister

2009-11-27T00:26:00.000+01:00

Vrijdag 27 november om 16.30 is de prizzentoatsie van de bundel Bliedschop veur t bezeren. Veur dizze bundel is n mooie keuze moakt oet de gedichten dij Henk Puister de ofgelopen 30 joar schreven het. De dichter zel interviewd worden deur Henk Scholte. John Kruisman en Rieks Folgerts zörgen veur muziek. Mitsoamensteller Jan Glas leest n aantal gedichten veur oet de nije bundel.

Plek: Huis van de Groninger Cultuur, Cascadeplein 4 Groningen